pichhli raat

pichhli raat meri neend toot gayi thi,
svapn adhuraa hi reh gayaa,
aaj woh adhuraa toota sa svapn,
mere bheetar ke sannaton ko cheer raha hai,
main unhen hi kaagaz par utaar raha hoon,
aur mere antarr ka shorr mujhe vaythit kiye ja raha hai,
kuch antaraal mein yeh maddham ho jayega,
reh jayengi bas meri aankhen,
jinme kuchh raaton tak neend nahi aayegi.

yaadon ki kitaab

yaadon ki kitaab mein na jaane kitne hi khwaab hain,
khwaab jo dil ke shaher ke musafir hain,
aate hain dabe paanv,
bina awaaz ke,
unn sabhi khwaabon ko sajaa rakhha hai maine apni kitaab mein,
jab bhi zindagii mein,
jeene ki wajha nahin milti,
khol leta hoon apni yeh kitaab,
aur yeh khwaab mere chehre par muskurahat la dete hain.